Un libro por descubrir: unha aventura por percorrer

De serpes e segas ( I )

2011-05-20T10:07:00.002+02:00

Deixamos nestas entradas os vídeos das representacións desta montaxe que se levaron a cabo os días 18 e 19 de maio de 2011, celebrando o Día das Letras Galegas e o Día Internacional dos Museos, na torre de San Paio de Narla

Día das Letras Galegas 2011: Lois Pereiro

2011-05-11T11:53:00.003+02:00

Deixamos neste blog unha boa presentación sobre a vida e a obra de Lois Pereiro, elaborada polas alumnas de 4º María José Lamas e Lucía Cabado.
Como xa sabemos, este autor, de orixe monfortina, é a quen se lle dedica o Día das Letras Galegas este ano.
A maiores deixámosvos este enlace no que poderedes atopar máis información sobre Lois Pereiro

LOIS PEREIRO on Prezi

De como se poden facer as cousas:( I.E.S. Fontem Albei da Fonsagrada)

2011-03-20T09:22:00.000+01:00

Estes días, por diferentes vías, chegou ata nós, este lipdup do I.E.S. Fontem Albei, da Fonsagrada.
Aparte da envexa que produce pensar na dinámica que permite e potencia a elaboración deste tipo de actividades dende a biblioteca do centro,aproveitar para felicitalos polo traballo ben feito que vén a demostrar que querendo todo é posible.
Desde aquí darlles os nosos parabéns. E a ver se algún día...

Deixémonos de dindirindainas! (II)

2010-12-06T12:49:00.000+01:00

Seguindo coa montaxe do curso pasado, os próximos 17 e 18 de decembro --venres e sábado-- o grupo de teatro "Algo máis que pan e queixo" porá en escena a continiación de "Deixémonos de Dindirindainas !". Seguindo a liña do ano pasado, nesta representación predominan os monólogos en clave de humor onde non se deixa "títere con cabeza" e ao tempo pretenden translucir unha crítica ás pautas sociais establecidas.

Este ano, incorporamos algunhas novidades ( non as imos desvelar) que afectan principalmente á posta en escena.

Este curso anovamos o cadro do grupo. Botaredes en falta ás que deixaron o C.P.I. e comprobaredes que contamos con novas incorporacións.

Estas novas integrantes, xunto coa veteranía dalgunha das participantes --algunhas, con estas dúas representacións, levarán xa catorce participacións: Lucía Argerey, María José Lamas e Laura G. Viñas-- forman un grupo que cremos acadarán un seguro éxito.

Esperemos que botedes unhas risas e ao tempo pensedes nas posibles segundas lecturas que a representación vai ter.

Magosto

2010-11-23T08:35:00.000+01:00

O pasado día 12 de novembro --venres-- celebramos o magosto no centro escolar. Había anos que por razóns diferentes non celebrabamos esta festa emblemática do noso calendario tradicional. Este ano, parece que virou o vento e empurrounos á celebración que tendo a castaña como eixo fundamental permiter facer todo aquilo que sexamos quen de facer.

De xeito ben organizado, todos sentadiños, fomos comendo nas castañas --previamente asadas nun forno da localidade-- ata fartar , polo que o corpo pedía algo de marcha e a rapazada botouse a participar nos múltiples xogos tradicionais organizados para tal evento.

O grupo de cantareiras devecía por botar uns cantos e sen insistir moito, cantaron e repicaron a pandeireta con moito estilo (hai que recoñecer que onde hai boa mestra e bo alumnado o resultado polo xeral soe ser exitoso). Notáselles a algunhas das pandeireteiras que non deixaron o instrumento no verán. Felicidades.

Pero a maiores este grupo, ben animoso por certo- habiamos aprender todos del-- botouse ao baile formando un curro altamente participativo amén de festivo.

Cara o ano que vén habería que mirar de facer unha pequena fogueira--botei de menos o poder tisnar a algún,sei que co risco de ser tisnado-- e apoiándonos nas cantareiras tan marchosas preparar unhas cantigas alusivas á festa.

Ah! esquecía que as "repartidoras" e organizadora da actividade levaban un "tocado" ben xeitosiño. Se xa son xeitosas elas, co mandil e o pano lucían como a que máis.

Deixamos este vídeo da actividade:

A hora da lectura

2010-11-01T19:24:00.000+01:00

Comezamos neste novembro unha andaina que esperamos sexa ventureira: Todos os días ímoslle dedicar un pouco de tempo á lectura na clase, independentemente da sesión na que esteamos. Trátase de facer da lectura, unha verdadeira ferramenta de lecer. A quen non lle gusta dedicar un tempo diario a algo que resulte ameno e divertido?

Esa é a idea. Cada un de nós, de todos nós, profesores, profesoras, alumnos e alumnas, durante este tempo que irá escalonado nas diferentes horas lectivas, segundo o calendario elaborado polo Centro, faremos do libro un amigo co que iniciar unha aventura.

Xa sabedes que no caso de non traerdes libro--pola razón que sexa-- na vosa aula haberá un caixón con algúns títulos para suplir a falta de memoria.

Desde aquí saudamos esta iniciativa e xa estamos desexando inciar a actividade.

Do teatro ás pandeiretas

2010-09-20T18:38:00.000+02:00

Achegamos aquí o cartel que convoca a aqueles alumnos e alumnas de E.S.O. que queiran participar neste curso nos Obradoiros de Teatro e de Pandeiretas.

Está aberto o prazo ata o 8 de outubro.

O grupo de pandeireteiras seguirá coordinado por Nazaré, e esperamos se animen máis alumnos para que no nadal poidamos saír cantar os reis.

Por outra parte tamén botamos a anadar co grupo de teatro. Despois dos éxitos acadados estes anos atrás, pensamos seguir na mesma liña e facer as dúas montaxes habituais: Para o mes de Nadal a continuación de Deixémonos de dindirindainas ! ( 2ª parte ) e xa para o mes de maio a obra que representaremos na torre de San Paio. Seguen os mesmos responsables coa actividade polo que non temos que contar nada que non se saiba.

Empezamos con ganas e esperamos que vos apuntedes. Gustaríanos que os obradoiros medrasen.

Empezamos

2010-09-10T16:59:00.000+02:00

Iniciamos un novo curso, de momento en Primaria e Infantil, coa mesma ilusión e ganas de traballar coas que rematamos o pasado ano.

En primeiro lugar, saudar a todos os membros novos da comunidade educativa, tanto pais, como alumnos de Infantil e por suposto ás novas incorporacións dentro do profesorado.

Contabamos con novos equipos informáticos para empeza a funcionar como C.E.D. ( Centro Educativo Dixital ), pero de momento teremos que armarnos de paciencia e esperar a que se resolvan os atrancos que impediron que o Proxecto Abalar fose posto en marcha segundo o previsto.

No contorno, observamos con mágoa a desaparición do parterre cos camelios que ornaban a saída do colexio. Se o ano pasado perdemos as coníferas do patio, este ano tocoulles a estoutras árbores. Semella que a doutrina de "menos cemento e máis talento" non é asumida por estes lares. En fin...

Coas baterías recargadas, cun máis que merecido descanso, os rapaces e rapazas do centro inician unha nova andaina para tratar de acadar máis coñecementos e competencias, e, o que é máis importante, prepararse para ser un cidadá libre, crítico e responsable.Esa é a nosa aposta, e desde o blog da biblioteca esperamos pór o noso gran para acadar eses obxectivos.

Por outra parte tamén seguiremos co Plano Lector que iniciamos o pasado curso,o que nos vai permitir --entre outras cousas-- gozar da lectura dentro do horario escolar, co aire lúdico que pode ter dita actividade.

Empezamos.

Graduación dos alumnos de 4º de E.S.O.

2010-06-22T22:58:00.001+02:00

Hoxe celebrouse a festa de Graduación da promoción que este ano remata 4º de E.S.O.

Só sumarnos á festa e aproveitar o vídeo que montaron e que recolle algún, dos diferentes momentos do seu paso polo centro.

Felicitalos por ter cumprida unha etapa no seu proceso formativo e esperar que sigan acadando novas metas.

Que os vosos soños se convirtan en realidade é un desexo da Comunidade Educativa, sabedora de que o seu futuro estará ,en breve, nas vosas mans.

Que todos os que saídes do centro este curso, sexades capaces de loitar por un mundo onde a solidariedade, o respecto e a xustiza sexan algo máis que palabras.

Moitas felicidades.

A montaxe do vídeo é obra da alumna Marta Blanco Pardo que deste xeito remata a súa andaina polo Centro.

De Azinhaga a Lanzarote: Unha viaxe polo mundo

2010-06-19T09:54:00.001+02:00

Morreu Saramago. Deixounos un modelo de escritor comprometido co mundo.

Certo que era un Premio Nóbel "...e que?" repostaba cun aquel de indiferenza de quen sabe que o verdaderio premio está na reivindicación constante e na denuncia permanente da inxustiza.

Deixamos aquí un seu pensamento recollido do seu blog "Outros Cadernos de Saramago" :
"Acho que na sociedade actual nos falta filosofia. Filosofia como espaço, lugar, método de refexão, que pode não ter um objectivo determinado, como a ciência, que avança para satisfazer objectivos. Falta-nos reflexão, pensar, precisamos do trabalho de pensar, e parece-me que, sem ideias, nao vamos a parte nenhuma" (Revista do Expresso, Portugal (entrevista), 11 de Outubro de 2008).

Quedan con nós as súas obras, o seu pensamento e a súa actitude.

John Thompson. Un norteamericano que fala e estuda o galego.

2010-05-28T23:36:00.000+02:00

Hoxe tivemos a segunda charla prevista no ciclo relacionado co Día das Letras Galegas. Despois dunha clarificadora presentación por parte da profesora de Historia, onde quedaron claros aspectos biográficos e bibliográficos do relator, pasamos a escoitar a conferencia deste norteamericano interesado pola nosa lingua e cultura. E non só interesado, senón fervente e defensor militante da lingua galega. Diciamos do outro relator que era raro; aquí só nos queda dicir que aparte de raro, é atractivo o seu posicionamento."Habiamos aprender todos del"

Nun ton supermoderado, John Thompson, explicou, con claridade, o tránsito histórico dende a II República ata o ano 2002, data na que grazas o labor altruísta e vindicativo da Asociación da Recuperación da Memoria Histórica dirixida por Santiago Macía, empezaron a realizarse as primeiras recuperacións e dignificacións da memoria dos desaparecidos da guerra civil, e que grazas a esta agrupación moitas familias puideron --despois de moitos anos-- dar por rematado un periodo de fonda intranquilidade por saber onde estaban os restos dos seus seres queridos.

E deixou unha pinga para a reflexión: Se nun país como o seu -- aínda que pode presumir de ser un cidadán do mundo-- por mor da discriminación positiva nas universidades, a súa presenza nas mesmas permitiu que un Obama chegase a presidente... ao mellor é que aquí realmente hai medo a que iso ocurra--non ao do negro --que seguramente que tamén-- senón ao feito de que un galego non amplo senso chegase a dirixir os destinos deste minúsculo territorio.

Grazas John, por espallar e defender a nosa cultura. Como ben dis, "paleto" é aquel que se nega a recoñecer que todo coñecemento aporta e enriquece. Alá coas súas teimas os ignorantes que deslexitiman o uso dunha lingua.

Gustaríanos ser alumnos teus na Universidade de Montana.

Pandeireteiras de Friol. 1ª actuación

2010-05-26T09:39:00.000+02:00

O pasado día 14 de maio, as pandeireteiras que xa levaban uns meses de ensaio, decidiron iniciar a súa andaina folclórica polas clases do Centro, aproveitando a celebración do Día das Letras Galegas.

Escolleron aos alumnos de Infantil,e fixeron resoar as súas pandeiretas acompañando co seu son ás cantigas preparadas para a ocasión.

Nós uqe non puidemos estar presentes na sesións, escoitámolas nos ensaios previos á mesma e, aínda que levan pouco tempo traballando a percusión, xa se aprecian por un lado os avances na técnica do instrumento e por outra parte o interese crecente pola actividade.

Desde o blog da biblioteca animámolas a seguir e felicitamos á coordinadora da actividade que tanto empeño pon na mesma.

Felicidades a todas.

Nota: Non colgamos antes esta entrada porque andamos bastante enleados.Pedimos desculpas aos que estivesedes esperando por nós. Esperamos ser máis áxiles en próximas ocasións.

Friol nas XI Xornadas de Artes Escénicas

2010-05-25T22:19:00.000+02:00

No día de hoxe o grupo de Teatro "Algo máis que pan e queixo" participou xunto co I.E.S. As Insuas de Muros, e os C.P.I. de Touro e Vedra, os dous da Coruña, na segunda xornada destes encontros teatrais.

O grupo de Muros , coordinado por Casas, representou a obra Agromar. Na mesma, un grupo de adolescentes reflectían as súas preocupacións e a súa diferente sensibilidade á hora de buscar saídas, a unha idade complicada. Gustounos.

Os de Touro e Vedra, dous C.P.I. que comparten actividades extraexcolares, neste caso coordinados por Alfonso - membro do grupo de teatro Metátese de Palas de Rei-- propuxeron mesturando son, imaxe e representación teatral, unha chea de dúbidas en diferentes formatos relacionados coa existencia do home no senso amplo do termo. Polo medio houbo tamén algunha chiscadela na que puxeron nalgún apreto subido ao escenario, ao coordinador do grupo de teatro friolés. Tamén nos gustou,... sobre todo ver ao profe en apuros.

Hai que lembrar que o coordinador do grupo --que foi tamén o que iniciou a práctica teatral en Muros-- foi , no seu momento, presidente da Federación Galega de Teatro Amateur. O título da obra: Palabras, que xa levan representado varios anos e mesmo representaron en Barcelona e Italia.

Do noso grupo, os primeiros en actuar, non imos dicir nada que non saibamos, iso si, chamou a atención a calidade de declamación das nosas actrices e a nula presenza masculina.

Como agasallo, as participantes recibiron unha camiseta alusiva á actividade.

Só queda agradecer á organización as facilidades e atencións recibidas.

Un poema de Uxío Novoneyra recuperado polo C:P.I. L. D. Moreno de Baralla

2010-05-11T19:36:00.002+02:00

Do C.P.I. Luís Díaz Moreno de Baralla, insertamos esta presentación e o seu comentario , ao tempo que felicitamos aos autores da mesma pois recupera un poema pouco coñecido de Uxío Novoneyra.

Di así:

"Manoel de Ribadaira foi unha vítima inocente do tempo que lle tocou vivir. Como en moitos outros lugares, no Courel tamén se practicaban "paseos" contra persoas que estaban baixo sospeita. Manoel foi unha delas. Con este poema de Novoneyra, se cadra pouco coñecido, recuperamos a memoria histórica".

manoel de ribadaira

View more presentations or Upload your own.

Uxío Novoneira

2010-05-07T23:42:00.000+02:00

Xa hai tempo que a rede ferve con cantidade de inciativas relacionadas co día das Letras Galegas deste ano. A verdade que o autor o merece, e non é menos verdade que cada vez somos máis os que gran a gran imos aportando cousiñas para dita celebración.

O CEIP Conde de Fenosa elaborou un material verdadeiramente atractivo para que os alumnos se acheguen á figura de Uxío Novoneira. Deixamos aquí o enlace por se alguén quere aproveitar este recurso.

Desde o noso blog felicitar o traballo destes compañeiros. Parabéns.

As ganadoras do Quen le que?

2010-05-05T21:42:00.000+02:00

Sara Martín de 4º e María José Lamas de 3º resultaron ser as vencedoras do Concurso Quen le que?. Ámbalas dúas lograron sete acertos. Só outros poucos acadaron os 6 acertos mínimos que se esixían para poder obtar ao premio, foron:Nuria Vázquez de 2º, Laura García e Roberto Amil de 3º, e Mª Alicia Penelas de 4º. Estes resultados foron brillantes e felicitamos a estes alumnos e alumnas que demostraron fino olfacto. No apartado dos profesores ganou por ampla diferenza Blanca Castro , a profesora de Xeografía e Historia que demostrando a súa gran capacidade olfactiva e concatenadora deu chegado aos 10 acertos, deixándonos lonxe ao resto dos compañeiros.

Felicidades e parabens para todas.

¿ Te acuerdas? : Éxodo de mujeres

2010-05-03T22:09:00.003+02:00

Hoxe no informativo do mediodía da TVE a sección ¿Te acuerdas? presentou unha pequena reportaxe co título de "Éxodo de mujeres".

Para a realización da mesma, un equipo da citada cadea achegouse ata Friol hai uns días, para , partindo doutra anterior feita no ano 1.979, completar unha visión ao mundo rural e o seu despoboamento feminino na actualidade.

Mellor que describilo é velo premendo neste enlace.

Raro, raro,raro,...

2010-05-01T00:18:00.001+02:00

Así poderiamos resumir a conferencia que hoxe pronunciou no Centro Sociocultural, Luís Villares; e non porque sexa un xuíz o que veña darnos unha charla, que non é o usual, nin porque a súa mensaxe a poidamos cualificar de rara.
Se así dicimos, é porque despois da súa exposición deixounos clara a situación da lingua galega, e como os prexuízos orixinan situacións ben chocantes; que, se non fose porque poñen en perigo a supervivencia dunha lingua, faríannos rir con esa risa sa e natural que temos en Galiza.
Porque raro é que moitos dos nosos devanceiros que despois de desenvolver toda a súa vida na súa lingua nai, á hora de 'cambiar de barrio', tanto para a nota necrolóxica como para a función relixiosa ou para a propia lápida, a lingua empregada sexa a castelá.
Causa, tamén, estrañeza o feito de que moitas persoas galegofalantes, ao traspasaren a porta dunha oficina, dun consultorio, dun organismo, muden de lingua e empreguen o castelán. Curioso
Non menos raro é o feito de que sendo os pais dun rapaz ou rapaza, galegofalantes entre eles, sen embargo se dirixan en castelán aos seus fillos.
Todas estas rarezas veñen provocadas polos prexuízos –actitude non fundamentada en razóns probadas - que moitos teñen tan asumidos que consideran o máis normal o cambio de lingua citado nas ocasións antes comentadas. Raro.
Isto, cremos nós, non é outra cousa que o reflexo dunha diglosia (emprego dunha lingua considerada máis culta para as relacións sociais máis elevadas deixando a outra relegada ás situacións sociais menos formais)que impide a harmonía lingüística na que cren vivir algúns e fai necesario un apoio sen reservas a un ben que é o noso patrimonio e que debemos defender.
A verdade é que, co ameno e claro que foi este xuíz da Fonsagrada, pasou a conferencia sen nos decatar.
Só queda agradecer que se achegase a estas terras e que compartise este tempo con nós.

As solucións a Quen le que ?

2010-04-30T16:59:00.002+02:00

Despois de moitas reflexións, análises e adiviñas, acabou o cocncurso "Quen le que? que xerou unha espectación inusual e mesmo certo nerviosismo entre os participantes. Aquí colgamos as solucións as actividdes e unha vez revisadas as respotas informaremos de quen gañou o premio.

Podemos dicir xa, que dentro do profesorado hai unha clara e nítida ganadora que atinou 10 resultados. Parabéns

Resultados

View more presentations from Friolteca.

Conferencias organizadas polo Departamento de Normalización

2010-04-28T22:32:00.000+02:00

Aproveitando a celebración das Letras Galegas o Equipo de Normalización Lingüística organizou dúas charlas para os días 30 de abril e 28 de maio.

Na deste venres falará o xuíz da Fonsagrada , Luís Villares Naveira e versará sobre "O galego e as leis", interesente e suxerente título , nos tempos convulsos que para a nosa lingua corren.

Luís Villares é tamén o coordinador territorial de "Xuíces para a Democracia" e é un dos xuristas que elaboraron a "Análise xurídica crítica das Bases para a elaboración do decreto do plurilingüismo no ensino non universitario de Galiza". Un home comprometido coa lingua.

O segundo conferenciante, na fotografía da dereita, é John Thompson, profesor da Universidade de Montana (U.S.A.), autor de diferentes traballos de investigación entre os que destacan "The Civil War in Galiza", e "As novelas da memoria. Trauma e representación da Historia na Galicia contemporánea".

Dous conferenciantes de luxo para unha celebración non menos luxosa.

De iconas e recursos para as Letras Galegas.

2010-04-28T14:14:00.000+02:00

A cabalo entre os dous meses máis literarios do ano, decidímonos a personalizar o enderezo do noso blog e deseñados e achegamos ao mesmo unha icona que, de momento, vai ser o logo representativo deste blog. (Se vos fixades , na barra de enderezos do navegador, á esquerda aparece unha icona )

Esperemos vos guste. Nas versións actualizadas dos navegadores máis empregados, tedes a opción de engadir o noso blog a favoritos e que quede enlazado directamente coa icona.

Sempre avanzando, imos dando pasos de a pouco, pero sen descanso.

Aproveitamos tamén para dicirvos que na sidebar (marxe esquerda do blog) veredes diferentes enlaces ao material que hai na rede para a celebración do Día das Letras Galegas deste ano que como xa sabedes dedícaselle a Uxío Novoneira.

Desde poemas musicados ata unidades didácticas, sen esquecer a montaxe que fixeron os do blog irmán de "Algo máis que pan e queixo".

Sementando

2010-04-26T15:18:00.001+02:00

Hoxe as profesoras de Infantil aproveitaron o bo tempo que gozamos para sacar aos máis pequenos ao patio e sementar unhas flores no xardin do noso Centro. Deixamos aquí unhas fotos da actividade.

Máis caligramas

2010-04-25T20:48:00.000+02:00

Libros_obxecto

2010-04-24T23:31:00.001+02:00

Ao abeiro da celebración do Día do Libro, o Departamento de Plástica organizou unha exposición na que se expuxeron os traballos que a partir dos libros idearon os alumnos de 3ºe 4º de E.S.O.

Aquí queda un pequeno resumo da mesma

Libros obxecto

View more presentations from Friolteca.

"Follas Novas. Novas Follas".

2010-04-24T11:20:00.000+02:00

Aproveitando a celebración do Día da Poesía ( 21 de marzo) e do Día do Libro,celebrado onte, a Rede Museística de Lugo programou a actividade que baixo o título "Rosalía de Castro: Follas Novas. Novas Follas" pretendía achegar aos máis novos o mundo da poesía --tan afastada, inxustamente, da primeira liña na actualidade-- , aproveitando tamén o estarmos no "Ano Internacional do achegamento entre culturas" e realizáronse nalgúns centros escolares da provincia pequenas actividades que tiveron como remate a realización dunha viaxe -onte-- á casa de Rosalía de Castro.

A nós colleunos inicialmente por sorpresa, pero fixemos un oco en 1º de E.S.O. e participamos na actividade. Ao final foron unha representación da clase, xunto con outros alumnos do Centro que participaron nos obradoiros da Torre de San Paio.

Polo que sabemos a actividade foi exitosa e estamos á espera de que os rapaces desprazados ata Padrón nos relaten as súas impresións.

Só queda felicitar ás promotoras da idea e ás persoas que con elas colaboraron.

Quen le que ?

2010-04-23T13:52:00.000+02:00

Xa está exposto o taboleiro cos datos para poder resolver a quiniela do Quen le que?.

Pódese constatar que a actividade está a xerar moitas expectativas. De feito non é raro ver a grupos de alumnos e mesmo de profesor@s comentando o emparellamento libro--profe.
Como consello diremos que convén andar coaas orellas ben abertas, pois en calquera momento dás cunha pista que nin sequera imaxinabas.
Non é fácil. Hai que prestar moita atención a algunhas cuestións relevantes que poden permitir tirar algunha conclusión que nos leve a atinar que lecturas fai , fixo ou aconsella cada profesor.

A data de publicación dos libros, a idade máis ou menos do profe ou "profa", a lingua na que está escrito,... son elementos que se os relacionamos ben poden dar pistas interesantes.
Nós andamos tamén facendo posibles encaixes, e, cun pouco de esforzo, imos colocando este aquí, aqueloutro acolá,... para despois desfacermos o que xa tiñamos feito e volver empezar.
De todas formas, dirémosvos que cun pouco de paciencia e dedicación podemos acadar un resultado, cando menos, digno.
Aproveitamos para dicir que hai moitas lecturas interesantes en todo ese abano de propostas; nós mesmos aproveitaremos algunhas delas para as nosas lecturas persoais.
Sorte.

Adiviña quen le que?

2010-04-21T22:02:00.002+02:00

Dentro das actividades relacionadas co Día do Libro estamos en pleno desenvolvemento da titulada "Quen le que ?"

Os profesores de E.S.O. contestaron a unha enquisa na que se lles pediu que dixesen que libro están lendo na actualidade, que libro lían na súa mocidade e que libro lle recomendarían aos seus alumnos. Deixamos aquí unha presentación coas 18 respostas recollidas.

Agora trátase de facer unha especie de "quiniela" na que cada un de nós trate de adiviñar a que profesor ou profesora corresponden as lecturas que se recolleron como resposta.

Quen adiviñe todas, ou aquel que dea máis respostas acertadas, levará un premio. E podémosvos asegurar que vai ser un bo premio.

Sorte

Que libro les

View more presentations from Friolteca.

Agasallo da biblioteca do I.E.S. dos Ollos Grandes

2010-04-20T23:39:00.030+02:00

Acabamos de recibir un pequeno agasallo.O logotipo de "Vale a pena ficar de ollho nesse blog!

As condicións que hai que cumprir para podelo insertar no noso blog son

Por unha banda colocar o logotipo co enlace ao blog que che concedeu a distinción. Doado de facer, sobre todo tendo en conta de onde nos chegou.

A segunda esixe que o noso blog designe outros dez que merezan tal distintivo.

Nós consideramos que o listado que poñemos a continuación son merecedores , por razóns diversas do citado logotipo:

Caracolatola
Ponte Vella
A Vacaloura
Unha lagoa de libros
FLE en ESO
Castro de Baronceli
Algo máis que pan e queixo
Biblomelide
As Mariñas
O recanto de Mik
Grazas.

Día do Libro: Primaria e Infantil

2010-04-19T14:06:00.000+02:00

Dentro das actividades deseñadas para a celebración desta data, en Primaria e Infantil, baixo o evocador título de "Libros con pegada, pegadas de libro" os alumnos , cada un na súa pegada , anota o título e autor da obra que máis lle gustou, que está lendo,... coas pegadas encheremos os corredores camiño da Biblioteca. Pensamos que vai ser algo impactante a nivel visual, e esperamos que atractivo a nivel lector.

Iniciámola hoxe, polo que o número de pegadas, como se pode apreciar na fotografía ,é pequeno. pero pouco e pouco irán aumentando as pegadas.

Caligramas

2010-04-18T20:19:00.000+02:00

Deixamos aquí algún dos caligramas que os alumnos de Secundaria estiveron elaborando esta semana.

Abril: Libros mil

2010-04-15T22:41:00.000+02:00

Neste mes estanse a desenvolver no Centro, unha serie de actividades que pretenden animar aos nosos alumnos a gozar da lectura.

Que o título do blog da biblioteca sexa "Un libro por descubrir: unha aventura por percorrer" deixa ás claras o que pensamos desta ferramenta, como fonte de descubremento de novas aventuras, novos mundos, diferentes formas de entender a vida, diversas canles para expresar emocións,...

Este perfil lúdico que nos permite crear historias a partir de historias e poder introducirnos na pel dos personaxes da lectura e viaxar canda eles entre as páxinas da múltiple oferta literaria da que hoxe en día dispomos na nosa biblioteca.

Dentro destas actividades, xa podemos ver a exposición de caligramas e libros abertos que os alumnos de E.S.O. teñen colocados no corredor de Secundaria.

Ao tempo estamos investigando sobre as lecturas que len, leron e recomendan os nosos profes. Mesmo haberá unha especie de quiniela con premio para aquel que atine co que len os seus profesores. Todo un reto.

Nas seguintes entradas deixaremos fotografías destas actividades.

A pasalo ben

lendo a todo tren

Novo Obradoiro de Canto Tradicional e Pandeireta

2010-03-05T23:27:00.001+01:00

Como nos gusta andar enleados, e vendo que hai "profas" animosas; ofertóuselle aos rapaces de Secundaria a actividade que no título indicamos. Como parece que é a tónica dominante, foron as rapazas as máis decididas e formamos un pequeno grupo, do que esperamos --seguro que si-- que xermolen os alicerces para unha futura Agrupación de Cantareiras.

A actividade ímola desenvolver todos os luns e comezamos, por ser data sinalada, este vindeiro día 8 de marzo.

8 de marzo: Día da muller traballadora

2010-03-05T21:47:00.002+01:00

8 Marzo Friol

View more presentations from jmcarricoba.

Un vídeo

2010-03-03T14:18:00.000+01:00

Non está tan afastado da realidade o que propón este vídeo que aquí colgamos. É certo que é sinxelo e o xogar cos tópicos pois en tópicos se quedan, pero unha mirada un pouco máis crítica pode dar claves para comprender e explicar un fenómeno , repetimos, non tan afastado.

8 de marzo: Día da muller traballadora

2010-03-03T14:11:00.000+01:00

Estamos nas datas previas á celebración deste Día.

Aínda que, para algúns ( e tristemente algunhas) xa é un tema superado, que a loita feminista é algo fóra da realidade...; a realidade precisamente, deixa constancia, tódolos días e a tódalas horas da minusvalorización do papel da muller na sociedade. É certo que se deron grandes avances con respecto á situación de hai anos, pero aínda queda un longo traxecto que percorrer.

Neste traxecto, non estaría demais que o mundo feminino asumise plenamente as conquistas acadadas e fose consciente do camiño que falta por andar. E facemos fincapé no feminino, por ser o sector que debería estar máis interesado nesta loita. Non por iso desbotamos a participación do home como elemento activo na defensa duns dereitos que ata que non sexamos quen de acadalos (como se di nas "Damas do Narla",obra de teatro que estamos preparando no centro) non poderemos falar dunha sociedade democrática plena.

Campaña a prol da Lingua Galega

2010-02-22T22:57:00.000+01:00

Non hai nada máis que dicir. Só ver e escoitar... e por suposto defender con orgullo o feito de sermos galegos.

E por fin: O Entroido

2010-02-12T19:17:00.000+01:00

Rematado o Meco polo equipo dirixido polo profesor de E. Plástica e Visual, deixamos aquí unha fotografía como mostra.

Queda a montaxe do vídeo da festa que faremos a vindeira semana.

Todos temos dereito a un pequeno descanso e de momento non vai haber máis entradas.

Despedímonos de vós

cómeda filloas e fritos

pero pensade tamén

que o xoves remata isto.

Boas vacacións

Venres (II)

2010-02-12T19:10:00.000+01:00

Venres: Unha de pés.

2010-02-12T19:03:00.000+01:00

A pesar de que pola tarde iamos ter a festa, non por iso deixmaos de cumprir as normas establecidas para toda esta semana. Ben é certo que baixou o número de persoas que cumpriron con todos os detalles establecidos.Hai que pensar que a seman foi longa e hoxe o interese estaba no disfrace da tarde. De todas formas houbo quen si as cumpriu.

O que si tivo máis éxito foi o do calzado diferente.

Vede as fotos e xa diredes.

Por certo, dous que van polo medio , tardaron en subirse á cheda do carro pero ao final fixérono.

Xoves de comadres (III)

2010-02-11T15:54:00.000+01:00

Aquí xa non dicimos nada. Só tedes que mirar para non cansar de ler tanto... Se vos fixades ben hai un infiltrado.

Xoves de comadres (II)

2010-02-11T15:29:00.001+01:00

Cumprindo coas normas os calcetíns viñan cada un da súa cor e así quedaron fotografados. Se sodes observadores saberedes de quen son cada par de pés.

Xoves de comadres

2010-02-11T15:21:00.000+01:00

Semella que ao achegarse este día o persoal vaise animando a participar da festa e xa é menos frecuente atopar a quen non cumpre as normas do Entroido friolés.

Certo que algúns xogan ao truco de sácame a foto que estou co disfrace e despois doume a volta e quito o equipamento.

Pero menos dá unha pedra.

Como é xoves de comadres , poñemos nesta entrada as comadres máis comadres de tódalas comadres.

Os de primeiro sonche festeiros

2010-02-10T16:16:00.001+01:00

Os de primeiro pra que non digan

somos festeiros tódolos días

pucho ou sombreiro na cabeciña

pra celebrarmos esta festiña

Entroido: mércores, continuación

2010-02-10T15:42:00.001+01:00

<><><><><><><>

Seguimos co xogo.

2010-02-10T14:44:00.000+01:00

O xogo de quen si quen non. Serás quen de adiviñar?

2010-02-10T14:37:00.000+01:00

Chegamos ao Ecuador das actividades

2010-02-10T14:04:00.000+01:00

Hoxe imos colocar alternativamente fotografías nas que se mostrades algo de fineza visual veredes algunha diferenza.

O xogo consiste en adiviñar quen si e quen non respecta as normas establecidas.

Nas próximas entradas empeza o xogo

De momento vai aquí o cartel do Entroido e unhas coplas alusivas:

Hai quen pensa que poñer

o pucho,o sombreiro e gafas

para que saquen a foto

e cumprir co establecido

pero direi, bo amigo

que a norma programada

di que a pucha e o mandil

hai que telo na xornada

non che vale o quita e pon

non vai co regulamento

e se queres quedar ben

respéctao en todo momento

Entroido: Martes

2010-02-09T16:40:00.000+01:00

No noso Departamento

temos de todo, amiguiños.

Hai unha nai abadesa

e outra que leva un laciño.

Carmelita ou capuchina,

eu non sei o que pareces.

Hai que ter pouca vergonza!

Xa sei que non a coñeces!.

Máis fotos deste martes ( con algún despistado...)

2010-02-09T13:00:00.000+01:00

Martes: Viva o Entroido !

2010-02-09T12:55:00.000+01:00

Martes

2010-02-09T10:34:00.000+01:00

Os alumnos de primeiro

Sonche pouco divertidos

Deben traer lazo e faldra

Veñen todos aburridos

Algún profe deste cole

Debeu perder a cabeza

Deixou os calzóns na casa

Puxo faldra amosa as pernas

Algún alumno da escola

Tenvos moi mala memoria

Deixa a gravata na casa

Non se une á cerimonia

Outras fotos de hoxe luns

2010-02-08T11:52:00.001+01:00

O Entroido 2010 (2)

2010-02-08T11:44:00.003+01:00

Hoxe luns, todos os que quixeron ( non moito a verdade) viñero con gravata, pucho e un lunar vermello na meixela esquerda segundo mandan as normas establecidas para este ano.

Aquí deixamos algunha foto de alumnos de ESO, de Primaria e dalgunha profesora animada e exemplificante.

Como estamos no Entroido

e escoitanse moitas cousas.

Diremos que o de "olvidarme"

sei que lles funciona a moitas.

Porque se dis esquecer!...

Cando o conxugan os nenos

os profes alporizados

ai Deus como nos poñemos!.

Esperamos que mañá

as normas sexan cumpridas

e non veñan onda min

quixen ai! pero esquecinas.

O "Guernica" de Picasso en 3D

2010-02-06T11:40:00.001+01:00

Paga a pena botarlle unha ollada a este vídeo que reproduce o Guernica de Picasso en 3D. Todo unha 'gozada' para a vista , acompañada con música de Manuel de Falla, todo un luxo.
Esperamos sexades da mesma opinión.

Se queredes coñecer a vida e obra de Picasso aquí tedes un bo enlace.

Entroido 2010. Quecendo motores

2010-02-04T19:23:00.000+01:00

Chega o tempo do Entroido, tempo de diversión e transgresión -dentro dunha orde--. As máquinas xa están traballando na confección do meco deste ano, das coplas e das actividades a desenvolver ao longo da próxima semana.

Avisar que o luns día 8 aconséllase vir con gravata, pucho e un lunar vermello na meixela esquerda.

Desde o blog da biblioteca sumámonos á festa cunhas coplas irreverentes e esperamos divertidas.

Se algún de vós ten outras facédeas chegar que volas publicamos.

Estas son as nosas:

Achégase o tempo do Entroido,

é tempo de diversión

esperamos que este ano

poidamos comer lacón.

Eu ben sei que hai algún profe

ao que lle gustan as coplas.

Se me deixase tranquilo

e non me fixese mofa!

A estrada de Friol a Palas

está feita un adefesio

vas no coche pisas freo

e apareces nun cortello

Este ano sei que si

as rapazas do teatro

por fin dixeron que al fin

na escena sae un gato

E ben sei que ese papel

é un papel apropiado

para quen fixo de serpe

na obra do ano pasado

Algunha xa se mancou

*pra facer de home tolleito

só lle falta preparar

os cantares do trobeiro

Eu non quero nin de lonxe

facer de dama agraviada

quero ser unha princesa

que vaia ben 'tuneada'

Unha actriz vaise marchar

deixaranos moi tristeiros

non lle veremos o pelo

no que se di un ano enteiro

Día da Paz: Outras fotografías

2010-01-29T19:14:00.000+01:00

Día da Paz

2010-01-29T19:06:00.000+01:00

Como o Día da Paz , este ano coincide sábado, o Centro decidiu realizar a celebración desta data, hoxe venres.

Como remate das actividades que se desenvolveron ao longo da semana,os alumnos de tódolos niveis saíron ao patio e ao compás das frautas e xilófonos dos alumnos de Primaria, cantamos o "Himno da Alegría", despregando pancartas, mans, pombas e mesmo máscaras sorrintes alusivas á data.

A celebración do Día da Paz, debe facernos reflexionar sobre a cantidade de inxustizas e desigualdades que hai no noso mundo e que, non por casualidade, fanse máis visibles nos países menos desenvolvidos.

Asemade debería reflectir tamén un posicionamento claro cara a procura da resolución dos conflitos pola vía pacífica. E cando falamos de conflitos , non só pensamos nos bélicos, que tamén , senón que nos queremos referir a aquelas pequenas desavinzas que xorden na vida diaria e que ás veces xeran situacións de difícil saída, cando se empregasemos o diálogo e a negociación, moitos destes pequenos desencontros terían doada solución.

Uxío Novoneyra.

2010-01-24T18:34:00.009+01:00

Deixamos aquí un pequeno vídeo cun texto de Uxío Novoneyra acompañado de Vivaldi e dunhas fermosas imaxes do Courel. A montaxe está feita por "Algo máis que pan e queixo"

A Real Academia Galega diante do Decretazo.

2010-01-19T15:23:00.002+01:00

Deixamos aquí o enlace para que poidades acceder ao ditame publicado pola Real Academia Galega sobre as "Bases para a elaboración do decreto de plurilingüismo no ensino non universitario de Galicia" que pretende levar adiante a Consellería de Educación. Unha rápida lectura do ditame amosa ás claras a sinrazón e falta de respecto ás normas que reflicten as citadas Bases. Lédeas que paga a pena.

Obradoiro de Panxoliñas (e IV)

2009-12-23T11:15:00.000+01:00

Nesta entrada os alumnos de 1º de E.S.O. cantan "No Pendello" unha das panxoliñas máis coñecidas por todas as terras centrais da provincia de Lugo.
Pedimos desculpas pola calidade das gravacións e aproveitar esta entrada para desexarvos a todos boas festas e feliz Aninovo.

Obradoiro de Panxoliñas (III)

2009-12-23T10:23:00.001+01:00

Estoutra foi preparada polos alumnos de 2º de E.S.O. ( grupo A) "Marchemos alegres". A ilustración pertence aos alumnos de 1º ciclo de E. Primaria

Obradoiro de Panxoliñas (II)

2009-12-23T09:40:00.002+01:00

Nesta ocasión son os alumnos de 2ºde E.S.O. (grupo B) os que interpretan "Vinde ver o neno".
A fotografía recolle a decoración dunha das clases de E. Infantil

>

Obradoiro de Panxoliñas ( I )

2009-12-23T09:14:00.031+01:00

Despois de estar ensaiando ao longo destes últimos días do trimestre e preparando os cantos de nadal para saír cantalos polas rúas da vila, tivemos que suspender a actividade polas circunstancias de sobra coñecidas.

Pensamos que para recoñecer o traballo de todos os alumnos e alumnas que voluntariamente aceptaron participar no Obradoiro de Panxoliñas, crimos que podiamos deixar constancia do feito no blog da biblioteca.

Como mostra deixamos aquí este primeiro canto de presentación interpretado polos alumnos de 1º de E.S.O.

A ilustración pertence a un cartel feito polos alumnos de E. Infantil

Acto en memoria de María José Carballal ( II )

2009-12-21T16:19:00.000+01:00

Mostráchesme o camiño día a día,

sempre atenta con nós a túa man mestra.

Mestura de paixón e intelixencia,

sempre viñas a min, á miña mesa.

Sementaches unha fraga de esperanza

onde todo era ermo e nordesía.

*Pra nós, fuches o faro que ilumina

a singradura que estabamos iniciando.

Con man segura e autoridade serena,

fixeches que chegásemos a porto.

Por ter esa ilusión coa que vivías,

xeraches inquedanzas de futuro

e agora, neste instante,… quedo mudo.

Non podo proseguir, debo lembrarte.

Lembrar cando baixabas ata a sala

en busca dun papel, dunha notiña.

Preguntabas en silencio, coa mirada,

e a seguir, seguías coa rutina.

E agora onde estás?

Quen nos vai dicir o que debemos

facer ou non facer ? ( ti ben me entendes).

Quedamos rosalianos

“sen amparo, sen arrimo”.

Non lograrán as horas esquecerte.

Mais tamén sei que quererías

que erguésemos a vista cara ao norte

collésemos coas mans a nosa historia,

e tentando non ferir nin ser ferido,

lograr un mellor mundo e acubillo.

Porque sabemos, querida profesora,

que escapaches, mais sen saber *pra onde.

Cando pasen os anos e lembre estes momentos,

mirarei ao ceo desde O Xobre e verei

un sorriso amplo, recendendo a mar e a compromiso,

que ha de lembrarme a ti e o teu destino.

Desde estas orfas terras

só nos queda dicir:

Non te esquecemos.

Acto en memoria de María José Carballal

2009-12-21T15:12:00.002+01:00

No día de hoxe celebrouse no centro escolar un acto en memoria da compañeira falecida a pasada semana, Mª José Carballal.

No mesmo dous alumnos do Centro ( Lucía López Cela de 5º de E.P. e Alex Vázquez Corral de 1º de E.S.O.) leron un texto alusivo ao momento. Posteriormente a Directora do Centro , en nome do Claustro de profesores, dirixiu unha palabras que finalizaron cun minuto de silencio acompañado por un fragmento do Requiem de Mozart, en lembranza e honra da compañeira que nos deixou.

Desde esta páxina agradecer a participación respectuosa dos alumnos e achegar, ao tempo, a nosa solidariedade con toda a comunidade educativa así como coa súa familia.

O Apalpador

2009-12-16T15:03:00.003+01:00

Estes últimos anos estamos asistindo á progresiva recuperación dun personaxe, O Apalpador, que , segundo conta a tradición, baixaba en tempos, das montañas do Courel a noite de ano vello para visitar as casas onde houbese rapazada.

Nesta visita comprobaba que os rapaces comeran dabondo ao longo do ano. Para iso apalpáballes a barriga; deixando unha presadiña de castañas, na cabeceira do leito e mesmo ás veces algunha peza entallada de madeira que el mesmo confeccionaba ao longo do ano. A actividade de entallador só a deixaba no tempo de ir soutar para ter castañas de abondo para as súas visitas.

Aquí deixamos unha publicación elaborada polo CEIP Alexandre Bóveda ao que lle agradecemos a súa publicación

APALPADOR

Publish at Calaméo or browse others.

Deixémonos de dindirindainas...!

2009-12-01T16:49:00.004+01:00

O próximo día 18 ás 12 e media da mañá, no Centro Sociocultural do Concello, terá lugar a representación "Deixémonos de dindirindainas...!" a cargo do grupo de teatro "Algo máis que pan e queixo".

Desta vez, e a xeito de contacontos presentamos unha obra áxil, actual e directa, bañada toda ela con boas pingas de humor. Para que a mestura saia no seu punto aproveitaremos a música do saxofonista Iago Castiñeiras, que interpretará algunha composición como toque melódico da obra.

O grupo , agás dúas baixas , segue contando coas mesmas actrices do curso pasado; a maiores, temos dúas incorporacións ,que non dubidamos han manter o nivel interpretativo acadado polo conxunto o pasado ano.

Para deterse cinco minutos

2009-11-30T18:37:00.000+01:00

Kseniya Simonova foi a ganadora da edición ucraína dun programa do estilo "Tes Talento".

Na final executó en directo unha animación da invasión de Ucraína durante a Segunda Guerra Mundial, empregando so os seus dedos e unha superficie de area.

Paga a pena deterse un momento e ver o vídeo. Sensibilidade, axilidade e por suposto dominio dunha técnica que non por efémera non deixa de ser brillante. Podes velo aquí

Uxío Novoneyra (II)

2009-10-16T20:02:00.000+02:00

Xa empezan a aparecer na rede materiais relacionados co autor elixido para a celebración do Día das Letras Galegas do ano que vén, Uxío Novoneyra.

Aquí da man de "Aurora" deixamos unha liña do tempo que permite teer unha visión global da vida e obra do autor.

Un adeus a ritmo de zamba: Morreu Mercedes Sosa.

2009-10-05T18:02:00.001+02:00

Deixounos orfos Mercedes Sosa. "La negra" como lle chamaban os seus. Queda a súa voz , voz que aproveitou non só como cantora senón que a alzou en contra de toda canta inxustiza se atravesou no seu camiño.

Cando aínda se tiña que escoitar ás agachadas por ser considerada "subversiva" non tiñamos claro se o apelido era Osa ou como tal é Sosa. Debía ser a súa forza vital a que xerou tal confusión.

Ampla é a súa discografía. Acompañamos esta despedida cunha das súas máis fermosas interpretacións "Alfonsina y el mar".

Ata sempre.

Comeza un novo curso

2009-09-11T10:36:00.002+02:00

Iniciamos un novo curso con ánimos redobrados e coas ganas de mellorar o xa feito ata hoxe.

As nosas capacidades sempre están dispostas para acadar un maior rendemento e isto é algo que debemos ter presente desde que sentamos no pupitre o primeiro día de curso.

O ser humano é capaz de acadar cousas sorprendentes a base da observación, o tesón e o traballo. Como mostra, aquí queda un enlace no que podemos comprobar ludicamente a capacidade do ser humano para crear e recrear todo aquilo que se propón.
Esperamos sexa do voso agrado , ao tempo que vos sorprenda como fixo con nós.

Feliz regreso ás aulas

Letras Galegas 2.010 : Uxío Novoneyra

2009-06-27T17:53:00.006+02:00

Na sesión de onte a Real Academia Galega acordou dedicarlle o "Día das Letras Galegas" do ano 2.010, ao poeta Uxío Novoneyra.

Nacido no Courel no ano 1930, aquí botou grande parte da súa vida, iso si, sen perder o contacto con Lugo dende que chegara a esta cidade para estudar o bacharelato.

Foi en Lugo onde coñeceu a Fole, Piñeiro, Manuel María e o noso Celestino Fernández de la Vega, homes máis vellos ca el pero cos que conectou axiña.

Nos anos oitenta marcha a vivir a Santiago de Compostela onde morrerá no 1.999, non sen antes presidir a Asociación de Escritores Galegos.

Desde aquí congratulámonos da elección deste nome para as Letras Galegas do 2.010, xa non só pola súa calidade literaria- que é obvia- senón pola súa bonhomía e sinxeleza vital.

A fotografía pertence á páxina www.uxionovoneyra.com que promoveu a súa candidatura a ser o autor das letras galegas 2.010

Lume novo, nº 27

2009-06-19T17:35:00.006+02:00

Con humor

2009-06-15T13:50:00.005+02:00

Deixamos aquí esta imaxe tomada prestada do blog da Biblioteca do I.E.S. Ollos Grandes.

Como ben din, hai que toma-las cousas con algo de humor.

Historias de Icía e avoa

2009-06-13T15:26:00.005+02:00

Aproveitamos esta viñeta de Sabela Arias , colgada no seu blog, "Historias de Icía e avoa" porque acáelle ben aos tempos que estamos vivindo.

Cremos non fai falta comentario algún.

En galego podemos chegar a todas partes ( guste ou non)

2009-06-11T22:04:00.007+02:00

Desde o blog da Biblioteca de Friol queremos facer un chamamento á cordura , que non parece sexa a que guíe os primeiros pasos dados polo novo conselleiro.

Gustaríanos saber a quen lle hai que dar máis credibilidade con respecto a esta pseudoconsulta que pretenden pasar como democrática, cando calquera observador imparcial a entende como algo sesgado e sen valor real ningún, cando nin sequera recolle tódalas posibilidades que ofrece o marco legal.

Diante de tal proposta "A Mesa pola Normalización Lingüística, xunto con outras organizacións con presenza no ámbito educativo, consensuou un posicionamento fortemente crítico coa consulta que está a realizar a Consellería de Educación. Ademais da propia Mesa, subscribiron ese posicionamento a Asociación de Directores e Directivos dos I.E.S., a AS-PG, CC.OO, CIG, Comités, Coordenadora de Equipas de Normalización e Dinamización Lingüística de Ferrolterra, Coordenadora de Equipas de Normalización e Dinamización Lingüística de Compostela, Coordinadora Galega de Equipos de Normalización e Dinamización Lingüística, CSI-CSIF, Federación de ANPAs de centros públicos de Ferrolterra, FETE-UXT, Nova Escola Galega e STEG.

Tendo en conta as valoracións realizadas nese posicionamento unitario, A Mesa realiza as seguintes propostas para facermos unha oposición activa a esta pseudoconsulta:

Marcar a opción “galego” (en infantil e FP) e “todo en galego” (primaria e secundaria), porque desta maneira estariamos a indicar que queremos en galego as materias que hoxe se deben impartir na nosa lingua, tal e como indica o decreto en vigor. Non significaría, por tanto, que optemos por todo o ensino en galego, pois esta opción non a considera a Consellería.

Incluír na epígrafe de observacións da consulta unha petición semellante á que se expresa a continuación:

Desexaría que o ensino fose en galego, unha opción que non recolle esta enquisa.

Estou a favor da aplicación do decreto actual de promoción e uso do galego no ensino, realizado co consenso da comunidade educativa e que emana do Plan xeral de normalización da lingua galega, aprobado por unanimidade no Parlamento galego.

Todo o anterior fai que os resultados desta consulta non me parezan lexítimos.

Cómpre que se dean a coñecer estas propostas ás familias con estudantes que vaian participar na consulta. Temos só esta semana e a vindeira (até o día 19) para o facermos.

Así mesmo, podemos divulgar unha sms co seguinte texto: “Consulta ensino en galego: Sinala galego/todo galego". En observacións pon: "Todo o ensino en galego. Aplicación actual decreto. Deslexitimo resultado da consulta.”

Galaxia reedita dúas obras de Celestino F. de la Vega

2009-06-10T22:40:00.009+02:00

Celebrouse onte na Deputación Provincial a presentaci'on da reedición de dous libros de Celestino Fernandez de la Vega por parte da Editorial Galaxia. "Ensaios a proba do tempo" e " O segredo do humor". O acto foi presentado por Víctor Freixanes director da editorial, Tonina Gay, presidenta da Asociación Cultural Valle- Inclán e polo profesor de filosofía Antón Baamonde, bo coñecedor da obra de Cilistro.

Aquí deixamos o enlace á noticia publicada en "La Voz de Galicia" e por outra parte unha imaxe do acto ( foto que acompañaba á noticia)

Asemade temos aquí outro enlace á nova publicada, neste caso, polo diario "El Progreso"

Para estudar xeografía

2009-06-10T21:23:00.002+02:00

Deixámosvos aquí un enlace onde atoparedes todo tipo de mapas interactivos. Para estudar xeografía dun xeito máis agradable e participativo.
Premede aquí e entraredes na páxina da que vos falamos

Jordi Sierra i Fabra

2009-06-09T16:36:00.007+02:00

Hoxe en 1º de E.S.O. rematamos as lecturas de clase deste curso. Queda unha actividade por facer, pero as lecturas están rematadas. Pero non é disto do que vou escribir aquí. Unha actividade máis, un curso máis,...

O que vou contar é outra historia.

Quedaban tres capítulos breves por ler entre todos. Con eles remataba a historia que nos tivo entretidos - creo que á maioría- ao longo do trimestre. Hoxe coñecimos o desenlace dun relato cheo de malos entendidos e de situacións chocantes.

Algúns alumnos preguntaron se había segunda parte!... se a historia continuaba !. Se o autor tiña máis libros !

Para que despois escoitemos por aí que aos alumnos non lles gusta a lectura...

Pois non. Non hai segunda parte pero o autor ten unha chea de historias máis, mesmo ten unha páxina que podedes visitar, e ler algunha cousa das que acaba de publicar, se premedes aquí iredes directamente á súa web.

Se alguén quere ler algo concreto e non o temos na Biblioteca xa sabedes con quen debedes falar e tentaremos solucionar o problema.

Xa se vos dixo tamén que andamos tentando adaptar unha das súas últimas obras. Cando o teñamos feito xa avisaremos.

De momento deixamos a foto de Jordi Sierra i Fabra e a portada dun dos seus libros máis divertidos.

As novas tecnoloxías escurecen Hong Kong

2009-05-31T23:14:00.003+02:00

Se premes neste enlace e pasas o rato de arriba abaixo na imaxe verás escurecer en Hong Kong. Curioso.

Chegounos vía e-mail e aquí podedes velo

Himno galego. Unha montaxe dos de informática

2009-05-29T16:32:00.005+02:00

Aproveitando o "Día das Letras Galegas" os alumnos da E.S.O. fixeron unha montaxe visual coa letra do Himno Galego. Esperamos que sexa do voso agrado

Entrevista a Cándido Pazó

2009-05-28T19:21:00.007+02:00

O pasado 21 de maio estivo connosco o polifacético Cándido Pazó presentando o seu "Espectáculo da palabra".

Transcribimos parte da entrevista que se lle fixo aproveitando a visita. As entrevistadoras foron Nerea e Yanira, alumnas de 3º de E.S.O. Grupo A

--Recordas cal foi o teu primeiro contacto co mundo do teatro?
Estaba en 8º de EXB , agora é 2º da ESO, non?, e fixemos unha obra de teatro co fin de recadar cartos para a excursión de fin de curso. Era unha obra en castelán, de Miguel Mihura. Unha compañía de teatro afeccionado que viu a función chamoume para actuar con eles.
--Como foron eses comezos?
Ós 15 anos comecei como afeccionado-serio, con moita dedicación. Iamos ensaiar todos os domingos e dous ou tres días por semana. Como profesional comecei ós 20 anos.
--Es actor, guionista, autor teatral, narrador oral, director de escena….En cal destas facetas te atopas máis cómodo ou disfrutas máis?
Son basicamente autor teatral, director de escena, narrador oral e actor. Eu resumo todo en que son cómico.
--Os teus espectáculos van dirixidos a distintos tipos de público, adulto, adolescente, nenos… Cal é o máis receptivo?
O público mesturado, onde hai xente máis maior e máis nova, porque entón hai estímulos e mensaxes que capta un neno, outros os máis maiores, e todo isto causa unha especie de disfrute colectivo. O maior divírtese porque ri o neno, aínda que el non o captara, e cando quen ri é o avó posiblemente o neno tamén entre en comuñón con todo aquilo. Quen di divertir, di sentir. O público mesturado onde a maior parte del sexa de mediana idade é o mellor.
O máis duro quizais sexa o público da terceira idade porque é difícil de mover.
O público adolescente non é o último, é dos primeiros, pásoo moi ben con eles. Eu poñería en segundo lugar do ránking ós adolescentes dos institutos.

--Estás compaxinando algún outro traballo con Espectáculo da palabra?
Si, claro. Estou cunha obra teatral que escribín e dirixín que se chama a Piragua. Representáraa co Centro Dramático Galego e agora retomeina cunha compañía privada. Trata da violencia de xénero, do maltrato á muller. Tamén outra peza unipersoal, Historia tricolores, na que mesturo a narración e o teatro. Dou cursos, presento festivais... Eu son cómico e vivo de facer moitas cousas distintas, entre outras razóns porque é necesario. É un pluriemprego que a min me gusta, pero ademais que sen el... Quero dicir que os actores que unicamente son actores teñen moitos problemas económicos para poder estar aí. Teño algúns amigos que agora o están pasando mal porque unicamente fan iso, ser actores, e se non traballan nunha serie, nunha obra de teatro, poden estar seis , sete, oito meses sen cobrar un peso. Claro, o actor cando traballa cobra moito, non vou vir aquí a chorar. Cando está nunha película cobra moito diñeiro, pero sabe que despois pode estar tempo sen traballar en nada e ten que gardar das risas para os choros.

A entrevista completa poderedes lela no "Lume novo" que en breve vai ser publicado

Mario Benedetti: In memoriam

2009-05-26T12:03:00.016+02:00

O pasado 17 de maio, mentres en Galicia celebrabamos o "Día das Letras Galegas" alén do mar deixounos o escritor uruguaio Mario Benedetti.

Quédannos as máis de oitenta obras ( poemas, teatro, narracións...) que ao longo da súa vida publicou un dos máis coñecidos e recoñecidos escritores iberoamericanos.

Deixamos este enlace para, se queredes, poder escoitar un poema recitado polo propio Benedetti.

E tamén estoutro poema ao que lle puxo música Alberto Favero e logo cantou a arxentina Nacha Guevara. Aquí podedes escoitalo

TE QUIERO

Tus manos son mi caricia

mis acordes cotidianos

te quiero porque tus manos

trabajan por la justicia

Si te quiero es porque sos

mi amor mi cómplice y todo

y en la calle codo a codo

somos mucho más que dos

Tus ojos son mi conjuro

contra la mala jornada

te quiero por tu mirada

que mira y siembra futuro

tu boca que es tuya y mía

tu boca no se equivoca

te quiero porque tu boca

sabe gritar rebeldía

Si te quiero es porque sos

mi amor mi cómplice y todo

y en la calle codo a codo

somos mucho más que dos

y por tu rostro sincero

y tu paso vagabundo

y tu llanto por el mundo

porque sos pueblo te quiero

y porque amor no es aureola

ni cándida moraleja

y porque somos pareja

que sabe que no está sola

Te quiero en mi paraíso

es decir que en mi país

la gente viva feliz

aunque no tenga permiso

Si te quiero es porque sos

mi amor mi cómplice y todo

y en la calle codo a codo

somos mucho más que dos

Como facer un traballo

2009-05-26T10:11:00.001+02:00

"Manda truco!. Resulta que os profes mándanme facer un traballo e eu coma sempre a velas vir. Pois si que o teño complicado. Que quererán ? Como hei facer?.
Sóame que nalgunha clase falaron disto pero coa miña memoria...
Terei que mirar de atopar algo por aí para ter unha idea para ver de que non me rifen desta vez."
Se estou lendo o teu pensamento, ao mellor tes sorte e visitando este enlace atopas algo que che interesa. Non, o traballo terás que facelo ti pero aí tes unha chea de ideas e suxestións que che van axudar a face-lo traballo.
Home, claro que hai que ler, pero niso estamos ,non?
Hai que agradecer á Ponte Vella de Rábade a idea.

Presentación

2009-05-25T15:47:00.000+02:00

Neste mes de maio dedicado ás Letras Galegas, poñemos en marcha no C.P.I. Dr. López Suárez de Friol o blog da Biblioteca Escolar coa esperanza de que esta ferramenta permita e facilite o acceso ao marabilloso, e ás veces esquecido, mundo da lectura.

Como ben reza o título do blog, un libro por descubrir é unha aventura por percorrer, cos seus riscos, coas incertezas producidas por algo novidoso, pero cun final que case sempre deixa un bo sabor e é a antesala a unha aventura nova que xere a mesma incerteza controlada.

Permitamos voar á nosa imaxinación e déixemoslle chegar aos lugares máis inimaxinables por medio das letras.

Boa viaxe.