10.6.19

Club de lectura



Un curso máis  quixemos darlle unha volta a algunhas das lecturas  do no noso  club e realizar actividades relacionadas con elas.
Nesta ocasión foi  a obra O veleno da risa a que nos animou ao grupo de 1º da ESO a percorrer Lugo.
Provistos dos aparellos cos que todo bo investigador debe contar, decidimos botarlle unha man a Tintimán e visitamos os lugares polos que andou o noso intrépido reporteiro; non fora a ser que perdera a concentración ao pasarlle por diante algunha rapaza xeitosa.
A proba do noso traballo de investigación quedou recollida nunha actividade que consistiu en incorporar a nosa imaxe aos fondos dos distintos espazos. Para realizala utilizamos a técnica do photoshop.

Os que quixeron vernos en busca das pistas tiveron que achegarse a un pequeno visor que incorporamos a unha caixiña.














   En canto  ás rapazas de 2º, 3º e 4º foi Penúltimas tendencias a obra que as inspirou   para ir un pouco máis alá. Eliximos os nosos poemas preferidos e aqueles versos que máis nos gustaron, impresionaron, impactaron..., aqueles cos que nos sentimos identificas, ou  que nos indican o camiño do que podemos chegar a ser, sempre cos pés descalzos e “a lingua solta”.

 Escribimos os versos, fotagrafamos os nosos pés libres, sen nada que  os oprima e, botamos unha ollada ao noso arredor. Reflexionamos sobre o feito de que moitos son os aspectos da vida que nos condicionan e   intentan  conducirnos por un camiño xa predeterminado. Pero tamén sabemos que  contamos co  “cerebro como arma de combate”.









9.6.19

O club de lectura e Paisaxe visitan Allariz




O prometido é débeda, así pois o 27 de maio o alumnado que forma parte do Club de Lectura deste curso e o que tamén estivo nel o pasado, acompañados polos rapaces e rapazas de 1º da ESO da asignatura de Paisaxe, marchamos de viaxe. Esta confluencia de alumnado debeuse a que o ano anterior non foi posible levar a cabo a saída programada para o noso club.
O destino nesta ocasión foi Allariz. A esta vila ourensá outorgóuselle no ano 1994 o Premio Europeo de Urbanismo, tamén está incluída no catálogo de boas prácticas da ONU e foi declarada Reserva da Biosfera en 2005, xunto con outros concellos da comarca.

Alí realizamos unha visita ao Museo do Coiro e ás imaxinativas propostas que forman parte do Festival Internacional de Xardíns de Allariz. Tamén gozamos dun agradable paseo pola beira do río Arnoia. Tras repoñer forzas co xantar formamos varios grupos que, provistos dun plano e con indicacións de lugares emblemáticos e curiosos da vila, dirixíronse a percorrela. Regresaron cargados de documentos gráficos.
Tamén coñecemos a lenda que deu orixe á Festa do Boi de Allariz.

Unha vez alcanzado o noso cometido en Allariz dirixímonos á Basílica da Asunción (ou Ascensión), inacabada obra dos templarios, e accedemos ao interior da cripta subterránea, coñecida como o Forno da Santa. O alumnado de 1º da ESO contounos a lenda de Santa Mariña e así soubemos a razón deste nome.
Tamén visitamos a Pena da Moura.








Mochilas viaxeiras



Outro ano máis as mochilas viaxeiras xa están de volta unha vez visitaron as casas do alumnado. E con elas chegaron unha chea de traballos feitos en familia. Aquí podedes ver a un grupo  no momento de recibir o lote de libros e máis abaixo a exposición dos traballos.









31.5.19

Música e traxe tradicional coa Asociación Antonio Gandoi





O pasado día 15, con motivo da celebración das Letras Galegas a Asociación Antonio Gandoy ofreceunos na biblioteca o seu espectáculo “ O son que me arroupa”.
A través da música tradicional, canto e teatro o alumnado puido achegarse  ás distintas clases e elementos do traxe tradicional galego, aos tecidos empregados e procesos de elaboración. Dunha forma amena e divertida tamén aprendemos  os diversos utensilios necesarios para a súa elaboración, así como outras curiosidades no deseño da costura, bordados dos abelorios  e simboloxías das cores.
Quedamos encantados  con este conto tan ben “fiado”.























21.5.19

Letras Galegas


O pasado xoves o alumnado de 3 anos pasou pola biblioteca para contarnos o que aprenderon sobre as Letras Galegas. E disfrutaron do lindo.






Todo o que se publica neste blog respecta os dereitos de autor.
Se alguén considera que algunha imaxe ou calquera outro elemento publicado vulnera estes dereitos, agradeceriamos se nos comunicase para eliminalo inmediatamente. Grazas