Charla sobre a prensa

O luns, día 13 o noso compañeiro Sergio López  ofreceu ao alumnado da  ESO un percorrido pola historia da prensa, tanto nacional como internacional,  desde o nacemento da imprenta, a súa expansión por Europa ata chegar ás primeiras  publicacións periódicas dos xornais. Resaltou a importante evolución na diagramación e maquetaxe  e a  revolución que supuxo a incorporación da fotografía nas súas páxinas ata chegar aos nosos días.  Nunha charla, tan instrutiva  como amena preparou ao alumnado para enfrontarse á realización dun xornal, tanto na parte dos contidos como na visual: as seis preguntas fundamentais que todo profesional do xornalismo debe responder con obxectividade, os distintos xéneros (crónica, noticia, entrevista… ), a importancia da tipografía e a súa elección,  a xerarquización das noticias e as distintas seccións que  compoñen a publicación e os elementos do que toda páxina debe constar.

Con formación periodística e experiencia laboral en varios xornais galegos, Sergio iniciou o que é a primeira parte dun proxecto que o centro se trae entre mans: crear o noso propio xornal. Ademais ofreceuse a prestarnos a súa  colección de xornais para organizar unha exposición. Desde aquí parabéns polo teu traballo e grazas.