Club de lectura

 

 

Na segunda avaliación o grupo de 3º e 4º da ESO realizou a lectura de Maus, a novela gráfica do autor estadounidense Spiegelman.

Comezamos visionando e comentando un power point que trataba sobre o ascenso do nazismo e as  súas consecuencias.

 

A continuación realizamos un achegamento a esta obra, que comezou  publicándose por entregas na revista Raw e que máis tarde  reuniron en dous tomos: “O meu pai sangra historia”, en 1986, e “E alí empezaron os meus problemas”, en 1991. Finalmente  aparecen  nun único volume: Maus.

No 1992, converteuse na primeira, e por agora única novela gráfica, en gañar o premio Pulitzer.

A obra parte da experiencia do propio autor que entrevistou ao seu pai, un xudeu polaco que sobreviviu ao Holocausto nazi.

A historia desenvólvese en dous espazos e tempos. En  Rego Park (Nova York)  Vladek Spiegelman,  un xudeu polaco,  cóntalle a historia das súas vivencias  durante a Segunda Guerra Mundial  ao seu fillo Art. Este logo relataraas  utilizando técnica do flash-bak.

As distintas nacionalidades que aparecen na obra están representadas por animais: gatos os alemáns, ratos os xudeus,  cochos os polacos, ras os franceses..., o que non lle resta un ápice de dramatismo á obra.

 O xeito  renovador de relatar a experiencia   marcou un antes e un despois polo que respecta a este xénero literario.

 A historia achéganos a un dos acontecementos históricos máis terribles e vergonzoso do século XX,  poñendo  de manifesto as grandezas e miserias dos seres humanos, e  amosando como todo  aquilo que nos ocorre vai conformando o noso carácter e comportamento.

Quixo a casualidade que coincidise no  tempo  coa lectura que realizamos na aula  do relato “O retrato”, que forma parte da obra Retrincos de Castelao.   O seu  remate levounos inevitablemente a un dos temas comentados no Club de Lectura: a esencia das persoas é a mesma en calquera parte do mundo. 

 

 No seguinte enlace podemos ler  a historia do autor galego  e poñela en relación coas viñetas:

 https://www.edu.xunta.gal/centros/eoipontevedra/system/files/Retrincos%20de%20Castelao_0.pdf

 

 Parte dos rapaces e rapazas tamén leron  O señor Ibrahim e as flores do Corán  de Eric-Emmanuel Schmitt. A historia narra as relación  dun rapaz xudeu e o tendeiro "árabe"  do seu barrio.

Tamén neste libro ten u papel importante a figura do irmán ausente:

"...que xa era difícil loitar cun recordo..."

Para completar a visión desta parte da historia o alumnado de 4º leu Reencontro de Fred Uhlman, libro ambientado en Alemaña en pleno ascenso do nazismo.

En primeiro ciclo a  lectura realizada foi Un sonido atronador de Ray Bradbury, un relato de ciencia ficción presentado por Ainhoha Pena, alumna de 4º da ESO e integrante do Club de Lectura  dende o primeiro curso, ano  no que grupo lera este mesmo texto,  e que precisamente decidimos volver a ofertar pola boa acollida que tivera entre o alumnado.

                Entre outros aspectos destacou  que o relato causa un gran impacto no lector facendo uso dunha prosa sinxela.

                Tras a lectura reflexionamos sobre se todo aquilo que é legal tamén é moralmente aceptable. Se o feito de ter posibilidades económicas nos permite realizar certas accións.

                Felizmente todo o grupo compartía a opinión do “non todo vale”.

 

 

 

    Tamén se  comezou a ler a obra A lebre mecánica de Ledicia Costas, que o alumnado escolleu entre outras posibles lecturas.

    O que os animou a elixir este libro foi que, unha vez lida a sinopse, quedaron coa intriga de cal sería a problemática á que deberían enfrontarse os protagonistas.