CLUB DE LECTURA: BOAS FESTAS E FELICES LECTURAS

Estamos a piques de irnos de vacacións! E para estes días familia, amizades, visitas e libros son, coma sempre, unha inmellorable compañía.

Esta semana reunímonos e o tempo non nos chegou a nada...

Comezamos  realizando un achegamento á lectura elixida para segundo ciclo que xa acordaramos  nunha anterior xuntanza. A suxestión veu de man  de Hugo e Noemí, os que, cando se pediu que o alumnado  elixise unha historia  que  todos deberiamos ler,  non  dubidaron e  exclamaron: Invisible! 

Entrambos realizaron a presentación do autor e a obra, ademais de compartir con nós as súas sensacións durante a lectura.

Leron as breves liñas que recolle a contraportada. Deron xa para reflexionar...

                                    "¿Quién no ha deseado alguna vez 

                                                    ser invisible?

                                   ¿Quién no ha deseado alguna vez

                                                    dejar de serlo? 

 

 

Despois retomamos unha actividade  xa iniciada noutra sesión  na que  compartiramos  as nosas opinións sobre a obra Iridium.

A valoración que fixeramos fora positiva e mesmo houbo quen  sinalou como aspecto negativo que a lectura era demasiado curta. 

Reflexionouse sobre as dificultades coas que se atopan no seu día a día as persoas con diversidade funcional, neste caso DCA (dano cerebral adquirido), tanto no aspecto físico e mental  como  no momento de retomar  vellas relacións ou entablar outras novas.

Valoramos os comportamentos  daqueles que rodean a protagonista e fomos conscientes de que tamén nós, mesmo coa mellor das intencións, podemos actuar baseándonos en  estereotipos e tratando de xeito uniforme a persoas que, como non pode ser doutro xeito, seguen tendo a súa propia individualidade. 

Aconsellamos ver algunha das intervencións de Inés Rodríguez, unha rapaza  con parálise cerebral que traballa como logopedista, é divulgadora e que ten unha sección no programa "El Intermedio".

 

Durante a lectura fóronse apuntando frases ou ideas da historia que nos gustaron ou deron que pensar.

Recompiláronse, e Susana  López realizou unha presentación  acorde coas festas que  están á volta da esquina e coa que queremos desexarvos un moi bo Nadal.

E  se ben estamos de acordo coa última  reflexión non queremos irnos sen propoñer outras lecturas.

 

Verónica, antiga alumna do noso centro e coa que temos a sorte  de contar entre nós como docente durante unha temporada, acompañounos nesta actividade  e comentounos as súas experiencias como lectora e tamén cal foi a obra que na súa adolescencia contribuíu a introducila no mundo da literatura. 

Graciñas.

Vémonos o próximo ano!

 E nunca perdades a ilusión...

CLUB DE LECTURA 2025-26

                        Ditosos os normais, 

                        eses seres estraños.

Este curso quixemos inaugurar o noso club cunha cita extraída da obra Iridium, porque ao igual que a literatura  ás veces reflicte realidades, ideas e principios nos que nos vemos reflectidos, noutras ocasións enfróntanos a mundos alleos aos nosos, cando non contrapostos.

Os libros teñen o poder de conseguir  que nos poñamos na pel dos demais e de que tomemos conciencia da multitude de condicionantes que inflúen no que cada un de nós somos. Quen le conta cun importante instrumento de achegamento á singularidade do ser humano.

Nas lecturas elixidas para este primeiro trimestre os protagonistas deben xestionar a súa realidade, ás veces adversa, ou ben crear unha alternativa máis satisfactoria ao que lles tocou vivir. Perseguen o que cada un de nós: acadar unha vida o máis plena posible.

En primeiro ciclo as obras elixidas son:

En segundo ciclo: 

Tamén se propuxeron as seguintes obras para aquel alumnado que desexe lelas a maiores.

Sara, alumna de 2º,  explicoulle a dinámica da actividade ao alumnado de 1º.

Para unha mellor comprensión da obra realizouse unha presentación  do escritor Ray Bradbury e a súa obra.

O alumnado de 2º ciclo coa obra Iridium.

 

 

Dámoslles a benvida tanto aos integrantes que xa teñen camiño percorrido nesta actividade como a aquelas e aqueles que se incorporaron recentemente. 

 

CLUB DE LECTURA: TRENZAMOS HISTORIAS

Neste mes xuño levamos a cabo unha actividade que nos facía especial ilusión: que o alumnado do club de lectura de 2º ciclo da ESO e o de 5º de Primaria  compartísemos unha historia.

O primeiro paso foi elixir as obras.  Optamos  por A trenza de Laetitia Colombani en secundaria e a adaptación dunha das historias, que leva por título La trenza o el viaje de Lalita, para o alumnado de primaria. Este último trátase dun álbum ilustrado con deseños de Clémence Pollet.

 

O resultado da xuntanza non puido resultar mellor. 

Os rapaces e rapazas de 5º  contáronnos a historia  de  Lalita e Smita  dun xeito claro, colaborativo, dinámico, interesante...  Achegaron datos para nós descoñecidos sobre os dalits, os intocables,  casta á que pertencen as nosas dúas protagonista, constituída polos membros  máis pobres e discriminados da sociedade india.  Ademais, a inmensa maioría de persoas que nacen dalit nunca saen desta condición. 

O alumnado de segundo ciclo comentou  algúns dos  aspectos que se tratan a maiores na versión que eles e elas leron. E tamén as razóns principais do título da obra: A trenza. Porque na súa lectura, xunto coa historia de Smita, intercálanse a de Giulia, en Italia, que descobre que a fábrica de perrucas do seu pai está a piques de quebrar, e a de Shara, en Canadá, que ve como a súa exitosa carreira como avogada se trunca de repente.

 

 

 

 

Rematou a  actividade co firme propósito de realizar outras actividades en común.

Así que nos despedimos cun doce:  ATA PRONTO! 

CLUB DE LECTURA: ENCETANDO LIBROS

 

Como xa se achegan as vacacións o noso club de lectura desexa compartir con vós o comezo das obras que puxemos en común neste curso en 2º ciclo. 

Ademais das catro ás que fixemos mención nas súas respectivas entradas,  queremos achegarvos outros títulos que tamén  foron lidos por algúns de nós e que se comentaron de xeito  máis informal.

Para que vaiades abrindo boca, nós encetámolos.

Samaín 24

 Un curso máis realizamos unha actividade global que xira en torno ao Samaín.

Nesta ocasión o punto de partida foron  historias clásicas de corte gótico e de ciencia ficción.

Velaquí as  obras  nas que nos baseamos.

Como xa mencionamos, tratouse dunha actividade interdisciplinar. Varios foron os departamentos que colaboraron en realizar a adaptación teatral de cada un destes títulos.

O alumnado invitado accedeu ás representación  presentando a súa entrada.

 

Presentamos o vídeo que recolle as distintas actuacións.