Blog da Biblioteca do C.P.I. Dr. López Suárez. Friol

12.5.14

RUTA POÉTICA AO SON DE MANUEL MARÍA




O 30 de abril un grupo de  alumnado con idades comprendidas entre os seis  e quince anos  e de profesores e profesoras  disfrutamos dunha xornada na que as actividades xiraron en torno á poesía.
 O primeiro alto no camiño  deste percorrido foi a rúa  Bispo Aguirre e a Praza Maior, e alí, ante as esculturas dos nosos poetas, o alumnado recitou algunhas das composicións  de Rosalía, Novoneyra, Pondal, Cunqueiro, Curros, Pimentel... Tamén lle fixemos unha concesión á prosa cunha  visita a Ánxel Fole e lendo un dos seus contos.
A continuación dirixímonos a Radio Lugo, e os nervios comezaban a roldar;  iamos realizar a gravación dos poemas de Manuel María no marco da actividade O Son da Nosa Fala, nun estudo con mesa redonda, micros, cabina de control...  Como verdadeiros profesionais os rapaces e rapazas recitaron os seus poemas. Non sería de estrañar que algún deles acabara no mundo das ondas, facultades non lles faltan. No peto levabamos un “pen” cos poemas gravados polos nenos e nenas de Infantil, que tamén apunta maneiras.
E seguimos ruta ata acadar o seguinte obxectivo, a casa natal de Manuel María  en Outeiro de Rei. As explicacións recibidas e o percorrido polas distintas dependencias con paredes cheas dos seus versos,  mergulláronnos no mundo poético deste escritor comprometido co país, a fala, o ser humano, a natureza, o amor...   

Unha estupenda e enriquecedora experiencia posto que nos deu a oportunidade de realizar unha actividade conxunta ao profesorado e alumnado de distintos niveis  e un achegamento á nosa poesía, tan necesario sempre porque, como  nos dicía outro insigne poeta,  Celso Emilio Ferreiro: “O pan é máis útil que a poesía, pro ¿cómo comer o pan sen o compango da poesía?”.


No hay comentarios:

Publicar un comentario

Todo o que se publica neste blog respecta os dereitos de autor.
Se alguén considera que algunha imaxe ou calquera outro elemento publicado vulnera estes dereitos, agradeceriamos se nos comunicase para eliminalo inmediatamente. Grazas