Cando no Club de Lectura compartimos as nosas impresións
sobre o conto a palabra que máis se
repetiu foi “ambición”. Isto levounos a
reflexionar sobre se o feito de ser ambicioso ten que ser forzosamente algo
negativo.
O primeiro que
fixemos foi buscar a definición: “desexo moi forte de conseguir ou obter algo”.
E chegamos á conclusión de que este
sentimento pode axudarnos a progresar en distintos aspectos da nosa vida. Non
hai nada malo en desexar mellorar a nosa marca deportiva, subir as nosas notas, dominar o mellor posible temas que nos apaixonan
…
O que fai desgraciado ao protagonista da historia non é o
seu lexítimo dereito de conseguir unha vida mais cómoda para el e os seus,
senón que ese sentimento o domine e non lle permita gozar dos seus logros nin
darse conta do moito que está perdendo polo camiño. O seu destino é a
insatisfacción e, polo tanto, a infelicidade.
E como cremos que os seres humanos, cada un polo noso
camiño, o que perseguimos é ser felices, decidimos que nos guiasen nesta procura
pensadores e artistas de distintas épocas e lugares. Así que recompilamos citas
e puxémolas en común.
Aquí deixamos algunhas delas para que, se vos apetece,
reflexionedes:
De Tolstói:
“A miña felicidade consiste en que sei apreciar o que
teño e non desexo en exceso o que non teño”
“O segredo da felicidade
non é facer sempre o que se quere senón querer sempre o que se fai”
“Os cartos, son unha nova
forma de escravitude, que só se distingue polo feito de que é impersoal, de que
non existe unha relación humana entre amo
e escravo”
Tamén nos gustaron:
“Cometín o peor pecado que un pode cometer. Non fun feliz”
Jorge
Luis Borges (SéculoXX) Escritor arxentino.
“Ningún home é feliz a menos que crea selo”
Publio
Siro (Século I AC-?) Poeta dramático romano
“Quen busca a felicidade fóra de si é coma un caracol que camiña na busca
da súa casa”
Constancio
C. Vigil (Século XIX-XX) Escritor e periodista uruguaio.
E para que continuedes cun sorriso o
voso feliz camiño:
“Meu fillo, a felicidade está feita de pequenas
cousas: un pequeno iate, unha pequena mansión, unha pequena fortuna...”
Groucho Marx (1890-1977) Actor
estadounidense.
No hay comentarios:
Publicar un comentario