Na segunda avaliación primeiro ciclo leu Eu son a
Comezamos a presentación da obra coa visualización da portada co fin de que comentasen cal pensaban que sería a temática.
Cando chegaron á conclusión de que se trataba dun campo de refuxiados cun neno como protagonista vimos un vídeo no que unha xornalista española de orixe alxerina conta a súa experiencia como nena que viviu nun destes campamentos, concretamente no de Tinduf, en Alxeria.
Deste xeito achéganse a esa forma de vida, desde o testemuño de alguén que o viviu e o conta, para poder así ser máis conscientes no momento da lectura.
Buscamos tamén en Google Maps onde se atopa este e outros campos, incluso os de España.
No segundo ciclo foi Iridium a lectura elixida.
A protagonista deste libro conta con algunhas características físicas que a diferencian das persoas que a rodean: unha proporciónalle unha “vantaxe” e outras dificultan a súa vida. A primeira é xenética e a segunda froito do azar.
Trátase dunha historia de superación, cos seus momentos de fastío, cansazo, rabia... Pero a maior parte das veces estes episodios son contados pola protagonista cunha ironía que, sen ocultar a súa dolorosa situación, nos amosa que non se rende e poderá chegar a acadar unha vida plena.
Igual que na anterior lectura constatamos que a visión que os demais teñen de nós non pode ser o que marque o noso rumbo. Tamén que o amor e actitude das persoas que nos rodean e a quen rodeamos son fundamentais para todos e todas.
A comezos deste curso contamos no noso colexio cun membro da asociación Aesleme que acudiu para dar unha charla na ESO dentro da campaña “Te puede pasar”, na que abordou o tema da lesión medular adquirida desde distintas perspectivas. Ter participado nesta actividade axudou a que o alumnado comprendese mellor a situación á que se enfronta a protagonista.
Charla asociación Aesleme Galicia
A continuación podedes ler a valoración que realizou Lucía Roca.
Iridium é un libro moi actual, o que podemos apreciar, por exemplo, nas referencias que realiza ás redes sociais.
A historia relata a vida dunha adolescente chamada Iris, moi coñecida sobre todo por ser unha das raíñas do Instagram e considerada unha persoa diferente debido aos seus ollos peculiares; un azul e outro verde.
O libro cóntanos o sucedido no atropelo que sufriu a protagonista e a súa vida despois de espertar daquel coma que durara seis meses. Tamén trata da súa historia de amor e do que aconteceu co seu antigo mozo.
A recuperación da rapaza foi complicada, pero a pesar diso conseguiu repoñerse moito e quería que a tratasen con normalidade e non como unha enferma. A súa vida cambiou ao completo tras aquel accidente, polo que tanto ela como as persoas do seu arredor o tiveron que aceptar e adaptarse ao sucedido.
Este libro encantoume, é desas historias que se len sen parar debido á intriga que xeran. Recoméndoo ao cen por cen , sobre todo a aquelas persoas que estean na época da adolescencia, xa que é unha idade na que empezamos a darnos conta do que é a vida e do que nos espera ao longo dela. De que as cousas poden cambiar nun segundo e deberemos comezar de novo todo aquilo que se tiña pensado facer no futuro.
Para rematar aínda con mellor sabor de boca deixamos o seguinte texto extraído da obra e suxerido por Ainhoa Busto:
E cando menos o esperas
a lúa xira ao teu redor
e tin nin sabías
que había un satélite de cores agardando por ti.
The Symphonic Eyes: “Moon and Sun”
No hay comentarios:
Publicar un comentario