7.6.23

ACTIVIDADE "ENCONTRÁNDONOS"

Dende o Equipo de Biblioteca coordinouse unha actividade en colaboración coa Asociación de Carballo Vivo de Friol para desfrutar xuntos dunha xornada de tarde. Durante a mesma o alumnado da Eso amosou diversas actividades elaboradas ao longo do curso entre distintas aulas e materias  potenciando así  a transversalidade.

Os integrantes do equipo da biblioteca tamén participan no grupo de traballo SEMGAL, que este curso se centrou en fomentar a participación dos diversos niveis educativos  en actividades conxuntas,  poñer en común intereses diversos e promover a  implicación  dos integrantes da comunidade educativa. A finalidade era  darlle un novo enfoque ás actividades de creación  no traballo diario da aula. 

Preténdese fomentar a asociación para enriquecer o máis posible a formación do noso alumnado. Asociarse é unha palabra ben diversa e activa. Un termo fundamental para entender a dinamización, o movemento e a motivación das persoas para participar na súa comunidade creando redes nas que encontrarse e colaborar. 

O noso desexo é que as rapazas e rapaces perciban que os contidos, destrezas e competencias adquiridas nunha área sempre se poden aplicar noutra, o que contribuirá a que se afiancen no tempo. 









No proceso destas actividades puidemos descubrir gustos, intereses e aptitudes das que moitas veces non eramos conscientes. 

Facendo e  partindo de referentes  tan variados ampliamos a nosa visión do mundo e, definitivamente, enriquecémonos.

Esperamos que desfrutedes coas nosas creacións.  

ACTIVIDADES
 
 Ofrecemos as distintas actividades coas presentacións  que realizou o noso alumnado no seu momento.

1. DÍA INTERNACIONAL CONTRA A VIOLENCIA DE XÉNERO. (25n)

No marco das actividades organizadas polo centro, Lucía, Ainhoa Pena e Manuela, alumnas de 4ª da ESO, recitaron  un poema titulado DISTO NON SE FALA, composición realizada  polas  escritoras Verónica Martínez e Emma Pedreira.

A elección debeuse a que tras unha primeira lectura todas nós  percibimos a sensación que as autoras pretenden transmitirnos. Porque, desgraciadamente, dun ou doutro xeito, con maior ou menor intensidade, nunha ou outra ocasión, todas sufrimos esta situación.

A  metade da poboación  non pode  sentir un plus de  inseguridade debido ao seu xénero  polo  simple feito de ir soa por unha rúa, sexa día ou noite.  Cremos que é simplemente inadmisible.

 


2. PRESENTACIÓN CANLE  DE YOUTUBE. 

Este curso 2022-23, as alumnas de 4º de ESO de tecnoloxía, inauguran a canle de ciencia "Marcochini", facendo referencia ao inventor italiano Guillermo Marconi. Nos sucesivos capítulos, científicos e científicas explican conceptos e fenómenos relativos á electricidade. 


3.  "E SE LLE DAMOS OUTRA VOLTA?" 
Presenta Manuela de 4º da Eso. 
Desexaría presentarvos unha sección do noso Blog de Biblioteca que ten por título “E SE LLE DAMOS OUTRA VOLTA?”. 

Nela recollemos noticias de  diversas fontes (case sempre prensa nos seus distintos soportes) que tratan de múltiples temas que por algunha  razón nos chaman a atención e  sobre  os que cremos que sería bo reflexionar.

Neste día centrámonos en dúas noticias que teñen en común a figura da muller e  as súas iniciativas para preservar a  nosa dignidade:

“NUNCA É CULPA TÚA”

Neste caso trátase da decisión dunha modelo á hora de realizar un desfile e  tras ser agredida por un home de madrugada uns días antes.

“A MAIOR ESCOLA CLANDESTINA PARA NENAS DE AFGANISTÁN”

Mazia, unha muller afgá, decide arriscarse a tomar esta valente decisión cando viu que a súa irmá pequena tiña vetado o acceso á educación.


Estas máis outras entradas atópanse neste propio blog.

4. LUSOFONÍA: 

O Departamento de Francés e o de Lingua e Literatura Galega realizaron unha actividade na que se pretende achegar ao alumnado aos mundos da francofonía e lusofonía mediante a lectura de poemas escritos por autores de diversos países que teñen como lingua oficial ou cooficial ben o francés, ben o portugués.

Imos compartir con todos vós algúns dos poemas traballados nas aulas. Son tres composicións do escritor, tradutor e periodista brasileiro Mario Quintana, considerado como  un dos maiores poetas do século XX do  seu país.

Naceu o 30 de xullo de 1906 na cidade de Alegrete e  faleceu  o 5 de maio de 1994 en Porto Alegre.

Chegou a publicar 34 libros, a maior parte de  lírica, moi influenciados pola poesía chinesa.

Na súa obra foxe do complexo e rebuscado e decántase por transmitir vitalidade e intensidade.

As composicións  que se escoitaron foron recitadas por Manuela Gil, que non puido ter mellor profesora para realizar esta actividade: a súa nai. 

O noso agradecemento ás dúas.

 





  

5. AS SUFRAXISTAS:

Retrocedemos 92 anos da nosa historia. Estamos no ano 1931, ano no cal o 14 de abril se proclama a 2ª República española. Inaugúrase unha época de grandes cambios e esperanzas para España: 
- Unha nova Constitución co recoñecemento de España como unha República democrática de traballadores de toda clase e un estado aconfesional, sen relixión oficial. 
- O recoñecemento de numerosas liberdades individuais: dereito ao divorcio e sufraxio universal masculino e feminino.
- A importancia do benestar social e o impulso da educación pública coa construción de milleiros de escolas.

A comezos dos anos 30 en España o nivel cultural da muller era baixo. Máis do 50%  eran analfabetas e carecían de dereitos políticos, estando sometidas aos homes (esposos, pais...) NON podían votar pero si ser elexidas para algúns cargos políticos. Nas cortes 1931 había tres deputadas: Clara Campoamor, Victoria Kent, e Margarita Nelken.

Compartimos o vídeo gravado por 4º da ESO no que se representa a aprobación do sufraxio feminino en España.




6. POESÍA DE MARICA CAMPO. 1º DA ESO

Esta escritora naceu no Val do Mao, no concello do Incio, ao Sur de Lugo, e alí pasou os primeiros anos. Logo marchou a Lugo onde foi á escola.
Na súa casa había unha biblioteca ben surtida xa que seu pai e a súa nai eran bos lectores. Isto influíu en que ela tamén o fose.
Gustoulle escribir dende pequena.
Exerceu de mestra en moitos sitios: desde Muimenta ( en Cospeito) a Canarias. Pero   onde estivo máis tempo  foi na Mariña de Lugo.  Rematou a súa etapa como mestra en Guitiriz.
A súa obra é moi extensa e escribiu tanto prosa como verso.

O alumnado le o poema  “Carta a Carapuchiña Vermella” que forma parte da súa obra Lecturas de aquí e acolá.

E como as cartas deben contestarse, iso fixeron. E en verso!

Grava e edita o alumnado de 3º da ESO.


7. ROSALÍA DE CASTRO.

 Se hai algún personaxe  coñecido para todos os galegos e galegas este é o de Rosalía. Así que decidimos

proporcionar esta información, pero en verso. 

A composición foi realizada polo alumnado de 2º da Eso e recitada por Lucía Espiñeira 

e Andrea Abeledo. 


 

 

 Debido á popularidade que acadaron poemas de Rosalía como  a “Negra sombra”,

 “Castellanos de Castilla”, “Campanas de Bastabales”, “A xustiza pola man”...

 e outros tantos, case sempre asociamos a poesía de Rosalía a unha visión da vida

 dolorosa, amarga. Pero a nosa autora tamén escribiu composicións nas que prima 

o costumismo, a ironía e mesmo certa irreverencia.

Así, para pechar esta actividade, e en relación cos últimos versos da nosa composición, imos recitar

 un poema que foxe da reflexión existencial e adopta outro enfoque:

Cando me poñan o hábito,

si é que o levo;

cando me metan na caixa,

si é que a teño;

cando o responso me canten,

si hai con qué pagarlle ós cregos,

e cando dentro da cova...¡

¡Que inda me leve San Pedro 

se só o pensalo non río 

con unha risa dos deños! 

¡Que enterrar, han de enterrame

anque non lles den diñeiro...!

 

 8. MULLER NA CIENCIA.

 Este curso, en 1º e 2º da Eso, analizouse o papel da muller na ciencia a través de profesionais de diversos ámbitos que traballan na actualidade.

Para isto recabouse información, nalgúns casos en contacto coas protagonistas do traballo, noutros a través de internet, vídeos, podcasts e lecturas de artigos.  Algunhas destas persoas son moi cercanas a nós e outras, aínda que vivan lonxe, por unha ou outra razón teñen relación co noso país.

Fórmanse os grupos logo de responder a un par de enquisas nas que o alumnado tiña que escoller a temática e forma de expresión na que crear o seu contido.

O resultado das pescudas preséntanse na clase para dar a coñecer referentes reais que non aparecen nos libros de texto.

Visualizaremos  agora, en distintos formatos, os vídeos que se crearon para tal fin. Perdoade os erros técnicos ou de son, xa que, de momento….. non hai profesionais en edición nesta actividade. 

Damos paso a vídeo…






No hay comentarios:

Publicar un comentario

Todo o que se publica neste blog respecta os dereitos de autor.
Se alguén considera que algunha imaxe ou calquera outro elemento publicado vulnera estes dereitos, agradeceriamos se nos comunicase para eliminalo inmediatamente. Grazas