Mellor centro na promoción do deporte escolar 2012: 

 CPI Dr. López Suárez de Friol

GALA DO DEPORTE GALEGO. LUGO

     O 21 de Marzo foi a data elexida para celebrar en Lugo unha nova edición dos Premios do Deporte Galego, que anualmente son convocadas pola Xunta de Galicia a través da Secretaría Xeral para o Deporte. Na edición correspondente a esta tempada, o CPI Dr. López Suárez foi galardonado como o mellor centro educativo na promoción do deporte en idade escolar, feito inédito ata o de agora na nosa provincia e que supón un forte impulso para o desenrolo da actividade deportiva e da actividade física, tanto no colexio como no entorno do pobo no cal está contextualizado o centro.

     Así, o xurado valorou que o noso “colexio público destacou no ano 2012 polo desenvolvemento de diferentes programas dirixidos ao fomento do deporte entre o seu alumnado. A súa implicación no programa XOGADE da Secretaría Xeral para o deporte, e nas accións vinculadas co deporte do programa PROXECTA da Consellería de cultura, educación e ordenación universitaria convérteno nun dos colexios de Galicia con maior participación do alumnado en programas deportivos interdisciplinares”.

     O trofeo conmemorativo deste premio foi recollido pola Directora do centro educativo, Dª. Asunción López. Neste acto estiveron presentes tanto o equipo directivo do colexio como os nen@s inscritos no programa do Xogade, é dicir, os membros do equipo de atletismo do colexio.
Información: Felipe Barata