CLUB DE LECTURA: CONCIENCIACIÓN SOCIAL, SUSPENSE E HUMOR DO ABSURDO

Nestes dous últimos meses os nosos clubs de lectura reuníronse en diversas ocasións. 

En segundo ciclo, nas xuntanzas realizamos un seguimento de lecturas e  puxemos en común as impresións que nos causou a historia narrada no libro de Eloy Moreno, Invisible. En xeral gustou  e ademais  deu moito de que falar; o tema non é para menos.

A historia levounos a reflexionar sobre a actitude que adoptamos cando  se dan  casos de acoso e somos coñecedores  deste feito. E se ben somos conscientes de que, por diversas razóns, ás veces  non nos implicamos o que sería necesario,  tamén  temos a certeza que estas situacións son intolerables. 

Intentamos poñernos na pel dos personaxes e así  comprender as actuacións de cada un deles. Todos e todas nos vimos reflectidos  no comportamento dalgún dos ou presenciamos  situacións semellantes ás  descritas nesta historia.  

Tamén debatemos se o agresor é á súa vez unha vítima das súas propias circunstancias vitais.

As persoas que recomendaran esta obra leron a que en certa maneira  é continuación de Invisible: Redes, da que xa se realizara unha pequena presentación  nunha das anteriores reunións.

Tamén se decidiu a lectura deste trimestre. Neste caso trátase dun libro que xa hai tempo se lera no noso club e ao que se aludira nalgunha xuntanza do presente curso. Unha alumna leuno e foi ela a que o propuxo. Así, tras dúas historias intensas en canto á temática, estamos a ler  a obra de suspense Un de nós mente de Karen M. McManus.

Na seguinte presentación, realizada por Susana Seijas, achegámonos á autora, á lectura seleccionada e a outras das súas obras. Ademais proporciónanos as razóns polas que deberiamos ler a obra.

 

En vista do éxito que estaba tendo a lectura da obra ofertouse a seguinte entrega: Alguien es el siguiente, que volve a retomar o tema daqueles aspectos da nosa vida que desexamos preservar. Pero isto ten un prezo. Hai que elixir: verdade ou atrevemento?

 

Como adoitamos facer propuxemos a lectura doutras obras que nos parece poden ser do interese do alumnado. Neste caso  botamos man do xénero teatral e lírico.

Cuatro corazones con freno y marcha atrás de Jardiel Poncela.

Makinaria e Penúltimas tendencias de Carlos Negro.

En primeiro ciclo, despois da lectura de Proxecto bolboreta, un libro que principalmente

aborda o tema de como os pequenos xestos, aqueles que facemos para axudar sen esperar

nada, poden transformar e ter efectos positivos na vida das persoas, pasamos a outro que 

tamén indaga nos cambios.

 

Cambios  de estado, de mundo, de emoción e situación… Trátase, nesta ocasión,  dunha obra

de teatro, Wombo Combo, de Paula Carballeira. Asistimos á historia de Sara, unha rapaza que

busca refuxio no mundo virtual porque está illada na vida real. O seu avatar é moi exitoso

mentres a súa persoa sofre a indiferenza de quen a rodea. 

 

Pero realmente hai indiferenza? Poderemos ver dende fóra algo que a Sara se lle escapa?

Estas cuestións e outras que tratan sobre as emocións que nos embargan cando somos

adolescentes son as que debatemos previamente á lectura.

Veremos que conclusións sacamos despois de ler a obra.